E Kemper eo bet dibabet gant kalz a aozadurioù (Mirdi Breizh an Departamant, Mirdi an Arzoù Kaer, Ofis An douristelezh, Selvij ar glad, Gouelioù Meur Kerne, Ti A r vro Kemper, Skol Broderezh Pascal Jaouen, tiez konverz… labourat asambles war un tem “2008 - Kemper - bloavezh an dilhad” : kinniget e vo deoc’h ur bern oberezhioù (diskouezadegoù, abadennoù animañ, prezegennoù…)   

- Mirdi Breizh an Departamant:

Abaoe an eil a viz C’hwevrer e kinnig Mirdi Breizh an Departamant ur stumm nevesaet evit  salioù diskouezadeg padus an dilhadoù e Penn ar Bed, ha pinvidikaet ouzhpenn : tu a vo deoc’h dizoleiñ prenadurioù nevez, dilhadoù brodet rouez an 19vet kantved hag ivez krouidegezhioù a-vremañ souezhus.

Azalek ar 15 a viz Even betek an eil a viz Here : Diskouezadeg termenet « La Bretagne en costumes ». Evit klokaat kinnig ar salioù padus e ro tu deoc’h an diskouezadeg da vont pelloc’h gant an dilhadoù e Penn Ar Bed, d’he bizitañ a giz da c’hiz, a vro da vro. Ouzhpenn mirout dilhadoù kozh e vez klasket bodañ modoù skeudenniñ arzhel. Skeudennoù kelaouennoù pe bruderezh a lak war wel selloù skoueriet boutin alies mat, berr ha droch a-wechoù, selloù taolet war ar vretoned hag ho tilhadoù kaer_kurius. 

- Mirdi an Arzoù-Kaer :

Azalek miz Ebrel betek miz Kerzu : Savet e vo ur sal diskouezadeg nevez gant  taolennoù a lak war wel gizioù Breizh a-hed ar c’hantvedoù.  

- Skol Broderezh de Pascal Jaouen :

Azalek ar 7 a viz Gouere betek ar 5 a viz Gwengolo : Diskouezadeg « Talents conjugués » un diskouezadeg taolennoù e lec’h en em gav broderezhioù « Glazig » Pascal Jaouen gant livadurioù an arzour a-vremañ Mick Jégou. Er skol broderezh (1, straed Kergariou) - digoust.  

- Ti Ar Vro Kemper :

Azalek ar 7 betek an 31 a viz Gouere : Kinnig dastumad dilhadoù krouet gant Romuald Hervé (paotr e stil – saver gobarioù titlet gant ar skol Esmod e Pariz). Labouret en deus Romuald Hervé war mare ar pardonioù e Breizh ha war daolenn Jules Breton « Pardon Kergoat » e lec’h e vez diskouezet dilhadoù tud pinvidik mes ivez re ar glaskerien bara en 19vet kantved.

Azalek an 21 betek 25 a viz Gouere : Skol Veur Hañv Gouelioù Meur Kerne - Ti Ar Vro Kemper (e Mirdi Breizh an Departamant) « Gizioù deus ar c'hiz – des guises à la mode » : kinniget e vo e-pad pemp devezh dizoleiñ istor an dilahd, e skeudenniñ hag ar c’hrouiñ a-vremañ awenet gantañ.

- Ofis an Douristelezh- Kemper : 

E miz Gouere ha Miz Eost  e vo kinnig un daouzek bennak abadenn gwelladenn heñchet diouzh noz war danvez an dilhad e Breizh graet gant un heñcher-prezegenner e galleg pe e saozneg.